داتا إنتري 2

روايات رومانسية بنكهة إسلامية

إنتشرت من فترة نوعية يمكن جديدة عليا من الروايات بتدور حوالين فكرة الرومانسية الإسلامية والشخصيات "الملتزمة" اللي أقرب للملائكة من البشر، فالملتزمين في هذة الروايات شكلهم وسيم وبدقن محددة بدقة حلّاق متمرس في المهنة لمدة 20 سنة، دة غير شخصيتهم الساحرة اللي بتقول إنهم أشخاص عقلانيين وبيتعاملوا مع الأخر بكل إحترام من وجهة نظرهم وهاديين ويحبوا يساعدوا الغير ويطبطبوا على عباد الله بفضل الله وأمره.

المشكلة عندي مش في كل دة، ياما في روايات حاولت تبني فكرة الإنسان المثالي دي من وجهة نظر الكاتب، لكن الروايات دي فعلًا سيئة، الكتابة ركيكة، الأحداث مفككة لتركيزهم بس على إظهار عظمة الشخصية اللي في خيالهم بعيدًا عن قوة الأحداث وأهميتها للبنية الرواية نفسها، دة غير إن الشخصيات بتكون سطحية وحواراتهم عبيطة ومفتعلة.

كل دة بيؤدي في النهاية إلى إن الروايات دي تطلع بشكل مبتذل جدًا، لكنها للأسف بتلاقي جمهورها، بس ما برضه أكثر الروايات إبتذالًا ليها جمهور، الجمهور في النهاية مش مقياس، مقياس الإبداع من وجهة النظري هو إحساسك إنت الشخصي بيه، هل شايف إنه فعلًا إبداع ويستحق ولا لا، وأنا بصراحة من وجهة نظري كل الروايات اللي من النوعية دي مفيش فيها أي لقطة إبداع واحدة حتى.

داتا إنتري 1

السقوط في دائرة العنف

إتفرجت النهاردة على فيلم Falling down من إخراج جول شوماخر (الراجل اللي بوّظ أفلام باتمان) وبطولة مايكل دوجلاس.

الفيلم بيتكلم عن موظف عادي بيتخنق من الحياة فبيقرر يواجهها بطريقته. راجل عادي، عصبي جدًا، ومجنون جدًا، عايز يروح يحضر حفلة عيد ميلاد بنته في بيت زوجته السابقة، بيطرد من شغله قبلها بشهر بالرغم من إنه كان صاحب إنجازات لكن الشركة كانت وعدته بمستقبل حافل وفي الأخر ولا خد منهم أي حاجة وإتطرد فكل شيء بقى بالنسبة له إتدمر، فقرر ينتقم من كل اللي مضايقينه في البلد.

الفيلم جيد، بس مش قد كدة، يعني الفكرة حلوة بس كان ممكن التنفيذ يبقى أحسن. الفيلم برضه كان فيه جزء كبير بيوضح إن المهاجرين نوعين، نوع حثالة وعالم زبالة وعصابات وأسلحة وكدة والنوع التاني نضيف وشغالين في البوليس وغيره من الأعمال الراقية، ودة شيء كان غريب بالنسبة لي لأنك مابتكونش عارف إيه السبب من التركيز عليه في فيلم بيقول إن أمريكا ممكن تبقى بلد ظالمة وفيها بطالة وفيها شحاتين وكل فساد وكل حاجة عادي زي أي بلد عالم تالت.

عمومًا محاولة جيدة من مخرج على قدّة تمامًا هي محاولة لا بأس بها خالص يعني.

إفتتاحية/برولوج

المدوّنة دي أنا عاملها علشان أكتب فيها عن الكتب والأفلام اللي هقرأها وأتفرج عليها في حياتي اليومية يعني، وجايز برضه أكتب فيها مواقف حصلت قدامي مثلًا لو شوفتها تستحق الكتابة، الموضوع كل تدوين وتمرين على الكتابة، والتدوينات هتتكتب باللغة العربية أو باللغة العامية عادي مش شرط لغة عربية بس.

جايز برضه أكتب عن أفلام شوفتها وعجبتني قبل ما أعمل المدونة دي، جايز أكتب عن كتب بحبها برضه، المهم إني هكتب وخلاص.